കണ്ണൂർ : ഇൻഡിഗോ എയർലൈൻസിനു വേണ്ടി ദോഹ -കണ്ണൂർ സെക്ടറില്‍ സർവിസ് നടത്തി ഖത്തർ എയർവേസ്. ഇന്ത്യൻ വിമാനക്കമ്ബനിയായ ഇൻഡിഗോ വാടകക്കെടുത്ത ഖത്തർ എയർവേസ് വിമാനമാണ് ഖത്തറില്‍നിന്നുള്ള പ്രവാസികള്‍ ഏറെ ആശ്രയിക്കുന്ന ഈ റൂട്ടില്‍ സർവിസ് ആരംഭിച്ചത്.
ആദ്യ സർവിസ് വ്യാഴാഴ്ച നടന്നു. ആഗസ്റ്റ് 29ന് രണ്ടാം സർവിസ് നടത്തും. തുടർന്ന് സെപ്റ്റംബർ, ഒക്ടോബർ മാസങ്ങളില്‍ കണ്ണൂർ-ദോഹ റൂട്ടിലെ ഇൻഡിഗോയുടെ പ്രതിദിന സർവിസില്‍ ഖത്തർ എയർവേസിന്റെ ബോയിങ് 737 മാക്സ് വിമാനം പറക്കും. 201 സീറ്റിങ് കപ്പാസിറ്റിയുള്ളതാണ് ഈ വിമാനം.
വ്യാഴാഴ്ച രാവിലെ എട്ടിന് ദോഹയില്‍നിന്നും പറന്നുയർന്ന വിമാനം ഉച്ചക്ക് 2.55ഓടെയാണ് കണ്ണൂരില്‍ ഇറങ്ങിയത്. വിദേശ കമ്ബനിയുടെ വിമാനത്തെ കണ്ണൂർ അന്താരാഷ്ട്ര വിമാനത്താവളം (കിയാല്‍) അധികൃതർ ജലാഭിവാദ്യത്തോടെ ഔദ്യോഗികമായി തന്നെ സ്വീകരിച്ചു. ഇതേ വിമാനം വൈകുന്നേരം 4.25ന് പുറപ്പെട്ട് ആറ് മണിയോടെ ദോഹയിലുമെത്തി. ഇൻഡിഗോയുടെ നമ്ബറില്‍ തന്നെയാണ് വിമാനത്തിന്റെ സർവിസ്.
പോയന്റ് ഓഫ് കാള്‍ പദവി ഇല്ലാത്തതിനാല്‍ വിദേശ വിമാനക്കമ്ബനികള്‍ക്ക് നിലവില്‍ കണ്ണൂരിലേക്ക് സർവിസ് നടത്താൻ അനുവാദമില്ലെന്നിരിക്കെയാണ് ഇൻഡിഗോക്ക് വേണ്ടി ഖത്തർ എയർവേസ് പറന്നിറങ്ങുന്നത്.
ഖത്തർ എയർവേസിന്റെ ആറ് ബോയിങ് 737 മാക്സ് വിമാനങ്ങള്‍ കഴിഞ്ഞ മാസമാണ് ഇൻഡിഗോ വാടകക്ക് എടുത്തത്. ഇൻഡിഗോയുമായി കോഡ് ഷെയറിങ് പങ്കാളിത്തമുള്ള അന്താരാഷ്ട്ര വിമാനക്കമ്ബനി കൂടിയാണ് ഖത്തർ എയർവേസ്.
ഇന്ത്യയിലെ മുൻനിര വിമാനക്കമ്ബനിയായ ഇൻഡിഗോയുടെ ഏതാനും എയർക്രാഫ്റ്റുകള്‍ അറ്റകുറ്റപ്പണികള്‍ക്കും മറ്റുമായി ഗ്രൗണ്ടിങ് ചെയ്ത സാഹചര്യത്തില്‍ അന്താരാഷ്ട്ര സർവിസുകള്‍ ഉള്‍പ്പെടെ മുടങ്ങാതിരിക്കാനാണ് ഖത്തർ എയർവേസില്‍നിന്ന് വിമാനങ്ങള്‍ വാടകക്കെടുത്തത്.
കഴിഞ്ഞ ജൂണ്‍ 30 വരെയുള്ള കണക്കുകള്‍ പ്രകാരം ഇൻഡിഗോയുടെ 70ഓളം വിമാനങ്ങളാണ് അറ്റകുറ്റപ്പണികള്‍ക്കായി നിലത്തിറക്കിയത്.
