കണ്ണൂർ : ദീർഘകാലം ബഹ്റൈൻ പ്രവാസിയായിരുന്ന തലശ്ശേരി സ്വദേശിയുടെ വീടെന്ന സ്വപ്നം സാക്ഷാത്കരിക്കാനായി പ്രവാസി സംഘടനകളും വ്യക്തികളും കൈകോർത്തു
ഷുഗർ കൂടി സല്‍മാനിയ ഹോസ്പിറ്റലില്‍ ചികിത്സയിലായിരുന്ന ഈ പ്രവാസി നാല് ഓപ്പറേഷനുകള്‍ക്ക് വിധേയനാകുകയും കാല്‍ വിരലുകള്‍ മുറിച്ചു മാറ്റേണ്ടിവരികയും ചെയ്തിരുന്നു. ഇതിനിടയിലും അദ്ദേഹത്തെ അലട്ടിയിരുന്നത് വീടോ സ്വന്തമായി ഒരു സെൻറ് ഭൂമിയോ ഇല്ലെന്നുള്ളതായിരുന്നു.
അമ്മയില്ലാതെ മൂന്നുമക്കള്‍ സഹോദരിയുടെ കൂടെയാണ് കഴിഞ്ഞിരുന്നത്. 2022 ആഗസ്റ്റ് മാസം തുടർചികിത്സയ്ക്ക് നാട്ടിലെത്തിയ ഇദ്ദേഹത്തിന് തണല്‍ ബഹ്റൈൻ ചാപ്റ്ററാണ് പ്രാരംഭ ചികിത്സ ലഭ്യമാക്കിയത്. തുടർചികിത്സയില്‍ ഒരു കാല്‍ മുറിച്ചുമാറ്റേണ്ടി വന്നു. ഇദ്ദേഹത്തിനൊരു വീട് നിർമിച്ചു നല്‍കണമെന്ന ലക്ഷ്യത്തോടെ, ബഹ്റൈനിലെ സാമൂഹിക പ്രവർത്തകരെയും സുഹൃത്തുക്കളെയും ഉള്‍പ്പെടുത്തി ഒരു വാട്‌സ്‌ആപ്പ് ഗ്രൂപ്പ് രൂപീകരിച്ചു.
ഹോപ്പ് ബഹ്റൈൻ നല്‍കിയ 3.25 ലക്ഷം രൂപയും ബഹ്റൈനിലെ സഹായമനസ്‌കരായ വ്യക്തികളും ഫ്രൈഡേ ഫ്രണ്ട്സ്, ഐസിആർഎഫ് തുടങ്ങിയ സംഘടനകളും കൈകോർത്ത് നാല് സെന്റ് സ്ഥലം വാങ്ങിയാണ് വീട് പണി ആരംഭിച്ചത്. പിഎംസി മൊയ്തു ഹാജിയുടെ നേതൃത്വത്തിലാണ് വീട് പണി പൂർത്തീകരിച്ചത്. ബഹ്റൈൻ കെഎംസിസി,തലശ്ശേരി മുസ്‌ലിം വെല്‍ഫെയർ അസോസിയേഷൻ ബഹ്റൈൻ ഉള്‍പ്പടെ ടിഎംഡബ്ല്യൂന്റെ വിവിധ പ്രവാസി സംഘടനകളും മറ്റ് സന്നദ്ധ സംഘടനകളും വീട് നിർമാണത്തില്‍ സഹകരിച്ചു.
ആഗസ്റ്റ് 21 ബുധനാഴ്ച്ച മൊയ്തു ഹാജി വീടിന്റെ താക്കോല്‍ കൈമാറി. ഷബീർ മാഹി, നിസ്സാർ ഉസ്മാൻ, അഫ്സല് എം കെ, ഹമീദ്, സിബിൻ സലിം, സാബു ചിറമേല്‍, നൗഷാദ്, ഹസീബ്, സക്കീർ, അഫ്സല് ഒസായി, അഷ്‌കർ പൂഴിത്തല, മെഹ്‌മൂദ്, അഷ്റഫ് തുടങ്ങിയവർ ബഹ്റൈനിലെ പ്രവർത്തനങ്ങള്‍ ഏകോപിപ്പിച്ചു
