കനത്ത ചൂട് അവസാനിക്കുന്നതിന്‍റെ അടയാളമായി വിലയിരുത്തപ്പെടുന്ന ‘സുഹൈല്‍’ നക്ഷത്രം യു.എ.ഇയില്‍ ദൃശ്യമായി.
അല്‍ ഐനില്‍ രാവിലെ 5.20ന് പ്രത്യക്ഷപ്പെട്ട നക്ഷത്രത്തിന്‍റെ ചിത്രം വാനനിരീക്ഷകർ പകർത്തിയിട്ടുണ്ട്. പരമ്ബരാഗതമായി അറബ് സമൂഹം കാലാവസ്ഥ മാറ്റത്തിന്‍റെ ചിഹ്നമായാണ് നക്ഷത്രം ഉദിക്കുന്നതിനെ വിലയിരുത്തുന്നത്. സുഹൈല്‍ ഉദിക്കുന്നതോടെ രാത്രികാലങ്ങളിലെ ചൂടാണ് ആദ്യഘട്ടത്തില്‍ കുറയുക. പിന്നീട് പതിയെ കാലാവസ്ഥ ശൈത്യത്തിന് വഴിമാറും.ആഗസ്റ്റ് 24ന് സുഹൈല്‍ പ്രത്യക്ഷപ്പെടുമെന്ന് എമിറേറ്റ്‌സ് അസ്‌ട്രോണമിക്കല്‍ സൊസൈറ്റി ചെയർമാൻ ഇബ്രാഹീം അല്‍ ജർവാൻ നേരത്തേ വെളിപ്പെടുത്തിയിരുന്നു.
മറ്റു ഗള്‍ഫ് രാജ്യങ്ങളിലും സുഹൈലിന്‍റെ വരവ് പ്രതീക്ഷയോടെയാണ് പരമ്ബരാഗതമായി കാത്തിരിക്കാറുള്ളത്. ‘യമനിലെ നക്ഷത്രം’ എന്നറിയപ്പെടുന്ന സുഹൈലിന് അറബ് പാരമ്ബര്യത്തില്‍ സുപ്രധാന സ്ഥാനമാണുള്ളത്. സുഹൈല്‍ പ്രത്യക്ഷപ്പെട്ട ശേഷം മേഖലയില്‍ ഏകദേശം 40 ദിവസത്തെ ‘സുഫ്രിയ’ എന്നറിയപ്പെടുന്ന പരിവർത്തന കാലാവസ്ഥയാണ് അനുഭവപ്പെടുക. തീവ്രമായ വേനല്‍ക്കാലത്തിനും ശൈത്യത്തിനും ഇടയിലുള്ള കാലമാണിത്.
പിന്നീട് ഒക്ടോബർ പകുതി മുതല്‍ കാലാവസ്ഥ ക്രമേണ സ്ഥിരത കൈവരിക്കും. സുഹൈലിന്‍റെ ഉദയത്തിന് നൂറു ദിവസങ്ങള്‍ക്ക് ശേഷമാണ് ശൈത്യകാലം ആരംഭിക്കുന്നത്.സുഹൈലിന്‍റെ വരവ് ഇന്ത്യൻ മണ്‍സൂണ്‍ ദുർബലമാവുകയും തെക്കോട്ട് നീങ്ങുകയും ചെയ്യുന്നതിന്‍റെ സൂചന കൂടിയാണ്.
ഇക്കാലയളവില്‍ ഈർപ്പം വർധിക്കുന്നത് മേഘങ്ങള്‍ രൂപപ്പെടാൻ കാരണമാവുകയും ചെയ്യും. ഇത് പ്രത്യേകിച്ച്‌ ഒമാനിലെയും യു.എ.ഇയിലെയും ഹജർ പർവതനിരകളുടെ കിഴക്കൻ ചരിവുകളില്‍ മഴക്ക് കാരണമാകാറുമുണ്ട്
