ആറു ദിവസം മാത്രം പ്രായമായ കുട്ടിയെ കൊലപ്പെടുത്തിയ സംഭവത്തില്‍ അമ്മ അറസ്റ്റില്‍.

ഡല്‍ഹി: നാലാമതും പെണ്‍കുട്ടി; അമ്മ കുഞ്ഞിനെ കൊന്ന് വലിച്ചെറിഞ്ഞു, പ്രതി അറസ്റ്റില്‍

ശിവാനി (28) ആണ് പിടിയിലായത്.

കുട്ടിയെ കൊലപ്പെടുത്തിയ ശേഷം മൃതദേഹം കവറില്‍ കെട്ടി സമീപത്തെ വീടിന്റെ ടെറസിലേക്ക് എറിയുകയായിരുന്നു. ഡല്‍ഹിയിലെ ഖയാല മേഖലയിലാണ് സംഭവം.

നാലാമതും പെണ്‍കുഞ്ഞ് ജനിച്ചതിന് പിന്നാലെ സമൂഹത്തില്‍ അവഹേളിക്കപ്പെട്ടുവെന്ന് ചൂണ്ടിക്കാട്ടിയായിരുന്നു കൊലപാതകമെന്നാണ് റിപ്പോർട്ട്.

വെള്ളിയാഴ്ച പുലർച്ചെ 5.30 ഓടെയായിരുന്നു കുഞ്ഞിനെ കാണ്മാനില്ലന്ന് ചൂണ്ടിക്കാട്ടി ഫോണ്‍ കോള്‍ ലഭിക്കുന്നതെന്ന് പൊലീസ് പറയുന്നു. സംഭവത്തിന് പിന്നാലെ പൊലീസ് ഉദ്യോഗസ്ഥർ സ്ഥലത്തെത്തിയിരുന്നു.

പ്രാഥമിക ചോദ്യം ചെയ്യലില്‍ കുട്ടിയുടെ അമ്മ സംഭവം നടന്നതിന് തലേദിവസമാണ് ആശുപത്രിയില്‍ നിന്നും ഡിസ്ചാർജ് ആയി മാതാപിതാക്കളുടെ വീട്ടിലെത്തിയതെന്ന് പറഞ്ഞിരുന്നു.

2 മണിയോടെ കുഞ്ഞിന് പാല്‍ കൊടുത്ത ശേഷം അമ്മയും ഉറങ്ങി. 4.30 ഓടെ ഉറക്കത്തില്‍ നിന്നുമുണർന്നപ്പോഴാണ് കുഞ്ഞിനെ അടുത്ത് കാണാനില്ലെന്ന് തിരിച്ചറിഞ്ഞതെന്നും പിന്നാലെ പൊലീസില്‍ വിവരമറിയിക്കുകയായിരുന്നുവെന്നും പ്രതിയായ അമ്മ പൊലീസിനോട് പറഞ്ഞു.

മൊഴിയുടെ അടിസ്ഥാനത്തില്‍ പ്രദേശത്ത് സിസിടിവി കേന്ദ്രീകരിച്ച്‌ അന്വേഷണം നടത്താൻ പൊലീസ് തീരുമാനിച്ചു. അന്വേഷണം നടക്കുന്നതിനിടെ സ്റ്റിച്ച്‌ നീക്കാൻ ആശുപത്രിയില്‍ പോകണമെന്ന് യുവതി പൊലീസിനോട് പറഞ്ഞു.

ഇത് പൊലീസില്‍ സംശയം ജനിപ്പിച്ചിരുന്നുവെങ്കിലും ആരോഗ്യകാരണങ്ങള്‍ ചൂണ്ടിക്കാട്ടി പൊലീസ് യുവതിയെ പോകാൻ അനുവദിച്ചു. ഇതിനിടെയാണ് സമീപത്തെ വീടിന്റെ ടെറസില്‍ വലിച്ചെറിയപ്പെട്ട കവറില്‍ കെട്ടിയ നിലയില്‍ കുഞ്ഞിനെ കണ്ടെത്തിയത്. ഉടനെ ആശുപത്രിയിലെത്തിച്ചെങ്കിലും മരണം സ്ഥിരീകരിക്കുകയായിരുന്നു.

ഇതോടെ കുഞ്ഞിന്റെ അമ്മയെ തിരഞ്ഞ് പൊലീസ് സംഘം സമീപത്തെ ബസ് സ്റ്റാൻ്റുകളിലും ആശുപത്രിയിലും അന്വേഷണം നടത്തുകയും തുടർന്ന് നടത്തിയ ചോദ്യം ചെയ്യലില്‍ പ്രതി കുറ്റം സമ്മതിക്കുകയുമായിരുന്നു.

കൊല്ലപ്പെട്ട കുഞ്ഞ് നാലാമത്തെ കുട്ടിയാണെന്നും നാലാമതും പെണ്‍കുട്ടി ജനിച്ചതോടെ സമൂഹത്തില്‍ നിന്നുണ്ടായ അവഹേളനമാണ് കൊലപാതകത്തിലേക്ക് നയിച്ചതെന്നുമായിരുന്നു പ്രതി പൊലീസിനോട് പറഞ്ഞത്. നാല് മക്കളില്‍ രണ്ട് പെണ്‍കുട്ടികള്‍ നേരത്തെ മരണപ്പെട്ടതായും യുവതി പൊലീസിനോട് പറഞ്ഞു.

സംഭവത്തില്‍ പ്രതിയെ പൊലീസ് അറസ്റ്റ് ചെയ്തിട്ടുണ്ട്. കുഞ്ഞിന്റെ മൃതദേഹം പോസ്റ്റുമാേർട്ടത്തിന് അയച്ചിരിക്കുകയാണ്. മരണത്തിന്റെ ശരിയായ കാരണം വ്യക്തമായ ശേഷം കേസില്‍ കൂടുതല്‍ നടപടികള്‍ ആരംഭിക്കുമെന്നും പൊലീസ് അറിയിച്ചു.