പോലീസിനെ കണ്ട് ഭയന്നോടിയ വിദ്യാർഥി കിണറ്റില്‍ വീണു. കളൻതോട് സ്വകാര്യ കോളേജിലെ ബിരുദവിദ്യാർഥിയാണ് പൂളക്കോട് സെന്റ് പീറ്റേഴ്സ് ജേക്കബ് സുറിയാനി ദേവാലയത്തിന്റെ സമീപമുള്ള 40 അടിയോളം താഴ്ചയും അഞ്ചടിയോളം വെള്ളവുമുള്ള കിണറ്റില്‍ വീണത്.
മുക്കം അഗ്നിരക്ഷാ സേനയെത്തിയാണ് വിദ്യാർഥിയെ രക്ഷപ്പെടുത്തിയത്. തിങ്കളാഴ്ച വൈകീട്ട് അഞ്ചരയോടെയാണ് സംഭവം.
കോളേജ് വിട്ട് ഇരുചക്രവാഹനത്തില്‍ മടങ്ങിയ വിദ്യാർഥികള്‍ ഹെല്‍മെറ്റില്ലാത്തതിനാല്‍ പോലീസ് വാഹനം കണ്ട് ഭയന്ന് വാഹനം നിർത്തി ഇറങ്ങിയോടുകയായിരുന്നു. കാടുമൂടിക്കിടന്നതിനാല്‍ കിണർ ശ്രദ്ധയില്‍പ്പെട്ടില്ല.
കൂടെയുണ്ടായിരുന്നവരാണ് വിദ്യാർഥി കിണറ്റില്‍വീണ വിവരം അറിയിക്കുന്നത്. ഉടനെ മുക്കത്തുനിന്ന് അഗ്നിരക്ഷാസേനയെത്തി റോപ്പിന്റെയും റെസ്ക്യു നെറ്റിന്റെയും സഹായത്തോടെ രക്ഷപ്പെടുത്തുകയായിരുന്നു. വിദ്യാർഥിക്ക് കാര്യമായ പരിക്കൊന്നും പറ്റിയില്ല.
