ഇന്ന് ചെറുപ്പക്കാരില്‍ കൂടുതലായി കണ്ടുവരുന്ന പ്രവണതയാണ് വളരെ വൈകി ഉറങ്ങുകയെന്നത്. ഫോണ്‍ ഉപയോഗമാണ് ഇതിന്റെ പ്രധാന കാരണങ്ങളിലൊന്ന്.
രാത്രി വൈകിയും സമൂഹമാദ്ധ്യമങ്ങളില്‍ സമയം ചെലവഴിക്കുന്നതും ഫോണില്‍ സംസാരിക്കുന്നതും സിനിമ കാണുന്നതുമെല്ലാം ഉറക്കത്തെ ബാധിക്കുന്നു. മാനസിക സമ്മർദ്ദംമൂലം ഉറക്കം വൈകിയെത്തുന്നവരും ഉണ്ട്. എന്നാല്‍ വൈകി ഉറങ്ങുന്നവരെ പിടികൂടാൻ ഒരു രോഗമെത്തുന്നുവെന്ന പഠനമാണ് പുറത്തുവരുന്നത്.
നേരത്തെ ഉറങ്ങുന്നവരെ അപേക്ഷിച്ച്‌ വൈകി ഉറങ്ങുന്നവർക്ക് ടൈപ്പ് 2 ഡയബറ്റീസ് (പ്രമേഹം) വരാനുള്ള സാദ്ധ്യത 50 ശതമാനം കൂടുതലാണെന്നാണ് പഠനം വ്യക്തമാക്കുന്നത്. പ്രമേഹത്തെ കൂടാതെ ഇത്തരക്കാർക്ക് ബോഡി മാസ് ഇൻ‌ഡക്‌സ് (ബിഎംഐ) കൂടുതലായിരിക്കും. ഒരു വ്യക്തിയുടെ ഭാരവും ഉയരവും കണക്കാക്കിയുള്ള മൂല്യമാണ് ബിഎംഐ.
മാത്രമല്ല ഇടുപ്പളവ് വർദ്ധിക്കും, വിസറല്‍, കരള്‍ കൊഴുപ്പ് പോലുള്ള ശരീരത്തില്‍ ഒളിഞ്ഞിരിക്കുന്ന കൊഴുപ്പ് കൂടുമെന്നും പഠനത്തില്‍ പറയുന്നു. സ്‌പെയിനിലെ മാഡ്രിഡില്‍ നടക്കുന്ന യൂറോപ്യൻ അസോസിയേഷൻ ഫോർ ദി സ്റ്റഡി ഒഫ് ഡയബറ്റീസിന്റെ വാർഷിക യോഗത്തില്‍ പഠനം അവതരിപ്പിക്കും. പഠനം നിലവില്‍ പ്രസിദ്ധീകരിച്ചിട്ടില്ല.
നെതർലൻഡ്‌സിലെ ലീഡൻ യൂണിവേഴ്‌സിറ്റി മെഡിക്കല്‍ സെന്ററിലെ ഡോക്ടർ ജെറോണ്‍ വാൻ ഡെർ വെല്‍ഡെയു‌ടെ നേതൃത്വത്തിലാണ് പഠനം നടത്തിയത്. ഉറക്കത്തിന്റെ സമയം, ശരീരത്തിലെ കൊഴുപ്പ്, പ്രമേഹ സാദ്ധ്യത എന്നിവയുമായുള്ള ബന്ധമാണ് പഠനത്തില്‍ മുഖ്യമായും കേന്ദ്രീകരിച്ചത്.
ഇന്ത്യയില്‍ ഏറ്റവും സാധാരണമായ സാംക്രമികേതര രോഗങ്ങളില്‍ ഒന്നാണ് ടൈപ്പ് 2 പ്രമേഹം. രാജ്യത്ത് 100 ദശലക്ഷത്തിലധികം പ്രമേഹ രോഗികളാണുള്ളത്. അമിതവണ്ണം, വ്യായാമക്കുറവ്, ക്രമംതെറ്റിയ ആഹാര രീതികള്‍ എന്നിവമൂലവും പ്രമേഹം പിടിപെടാമെന്ന് പഠനങ്ങള്‍ വ്യക്തമാക്കുന്നു.
നെതർലൻഡ്‌സ് എപ്പിഡെമിയോളജി ഓഫ് ഒബിസിറ്റി പഠനത്തിന്റെ ഭാഗമായി 5000ത്തിലധികം വ്യക്തികളില്‍ നിന്നുള്ള വിവരങ്ങളാണ് വിശകലനം ചെയ്തത്. 56 വയസുവരെ പ്രായപരിധി നിശ്ചയിച്ചായിരുന്നു പഠനം നടത്തിയത്. ഇവരില്‍ നിന്ന് ഉറക്കത്തിന്റെ ശീലങ്ങള്‍ ചോദിച്ചറിഞ്ഞായിരുന്നു വിശകലനം. ശേഷം ഇവരെ മൂന്നായി തരംതിരിച്ചു.
ഏർളി ക്രോണോടൈപ്പ്: നേരത്തെ ഉറങ്ങുകയും ഉണരുകയും ചെയ്യുന്നവർ
ഇന്റർമീഡിയറ്റ് ക്രോണോടൈപ്പ്: സമയബന്ധിതമായ ഉറക്ക ഷെഡ്യൂള്‍ ഉള്ളവർ, നേരത്തെയോ വൈകിയോ അല്ല.
ലേറ്റ് ക്രോണോടൈപ്പ്: വൈകി ഉറങ്ങുകയും വൈകി ഉണരുകയും ചെയ്യുന്നവർ
ശേഷം പഠനത്തിനായി തിരഞ്ഞെടുത്തവരുടെ ബിഎംഐ, ഇടുപ്പളവ്, ശരീരത്തിലെ കൊഴുപ്പിന്റെ അളവ് എന്നിവ അളക്കും. വിസറല്‍, ലിവർ ഫാറ്റ് എന്നിവ എം ആർ ഐ സ്‌കാനിലൂടെയായിരിക്കും കണ്ടെത്തുക. ആറുവ‌ർഷത്തോളം നടത്തിയ പഠനത്തില്‍ പഠിതാക്കളില്‍ വൈകിയുറങ്ങുന്ന ശീലമുള്ള 225 പേർക്ക് ടൈപ്പ് 2 പ്രമേഹം ബാധിച്ചതായി കണ്ടെത്തി.
പൊതുവില്‍ പിന്തുടർന്ന് പോകുന്ന ഉറക്ക ശീലങ്ങളുമായി സമന്വയമില്ലാത്തതാണ് ലേറ്റ് ക്രോണോടൈപ്പുകളുടെ ബോഡി ക്ളോക്ക് അഥവാ സർക്കാഡിയം റിഥം എന്നാണ് പഠനത്തില്‍ വ്യക്തമായതെന്ന് ഡോക്ടർ ജെറോണ്‍ വാൻ പറഞ്ഞു. ഇത് സർക്കാഡിയന്റെ തെറ്റായ ക്രമീകരണത്തിലേക്ക് നയിക്കുമെന്നും ഇത് ഉപാപചയ അസ്വസ്ഥതകളിലേയ്ക്കും ആത്യന്തികമായി ടൈപ്പ് 2 പ്രമേഹത്തിലേക്കും നയിച്ചേക്കാമെന്നും ഡോക്ടർ വ്യക്തമാക്കി.
പ്രായം, ശാരീരിക പ്രവർത്തനങ്ങള്‍, ഉറക്കത്തിന്റെ ഗുണനിലവാരം തുടങ്ങിയ ഘടകങ്ങള്‍ പരിഗണിച്ചാലും മറ്റ് രണ്ട് ഗ്രൂപ്പുകളെ അപേക്ഷിച്ച്‌ ടൈപ്പ് 2 പ്രമേഹം വരാനുള്ള സാദ്ധ്യത ലേറ്റ് ക്രോണോടൈപ്പുകളില്‍ 46 ശതമാനം കൂടുതലാണെന്ന് കണ്ടെത്തി. ഇവർക്ക് ഉയർന്ന ബിഎംഐ, വലിയ അരക്കെട്ടുകള്‍, കൂടുതല്‍ വിസറല്‍, കരള്‍ കൊഴുപ്പ് എന്നിവയും രൂപപ്പെട്ടതായി പഠനത്തില്‍ കണ്ടെത്തി. രാത്രി വൈകിയുള്ള ആഹാര ശീലങ്ങളും ഫോണ്‍ ഉപയോഗവും മറ്റും ഒഴിവാക്കുകയെന്നതാണ് ഇതിനുള്ള പ്രധാന മാർഗങ്ങളിലൊന്നെന്നും ഡോക്ടർ നിർദേശിച്ചു.
