കോളേജിലെ ഓണാഘോഷത്തിനിടെ അദ്ധ്യാപകൻ കുഴഞ്ഞുവീണു മരിച്ചു

കൊച്ചി: കോളേജിലെ ഓണാഘോഷത്തിനിടെ അദ്ധ്യാപകൻ കുഴഞ്ഞുവീണു മരിച്ചു. തേവര എസ്.എച്ച്‌ കോളേജിലെ സ്റ്റാഫ് സെക്രട്ടറിയും കോമേഴ്‌സ് വിഭാഗം അസിസ്റ്റന്റ് പ്രൊഫസറുമായ തൊടുപുഴ കല്ലൂർക്കാട് വെട്ടുപാറക്കല്‍ ജെയിംസ് വി.ജോർജ് (38) ആണ് മരിച്ചത്. ഇന്നലെ വൈകിട്ട് നാലോടെ കോളേജിലെ അദ്ധ്യാപകരുടെ ഓണാഘോഷത്തിന്റെ ഭാഗമായുള്ള വടംവലി മത്സരത്തില്‍ പങ്കെടുത്തശേഷം വിശ്രമിക്കുമ്ബോള്‍ കുഴഞ്ഞു വീഴുകയായിരുന്നു. ഉടൻ തന്നെ എറണാകുളം മെഡിക്കല്‍ ട്രസ്റ്റ് ആശുപത്രിയില്‍ എത്തിച്ചെങ്കിലും മരണം സംഭവിച്ചു. വെട്ടുപാറക്കല്‍ പരേതനായ വർക്കിയുടെയും മേരിയുടെയും മകനാണ്.

മൃതദേഹം ഇന്ന് രാവിലെ രാവിലെ 8.30 മുതല്‍ 9.30 വരെ കോളേജില്‍ പൊതുദർശനത്തിന് ശേഷം തൊടുപുഴയിലെ വസതിയിലേക്ക് കൊണ്ടുപോകും. ഭാര്യ: സോന ജോർജ് (അസി. പ്രൊഫസർ, ന്യൂമാൻ കോളേജ്, തൊടുപുഴ ). രണ്ട് വയസുള്ള ഒരു കുട്ടിയുണ്ട്.