റിയാദ് സീസണ് ഉപയോഗിക്കാനായി ജിദ്ദയില്‍നിന്ന് റോഡ് മാർഗം കൊണ്ടുപോകുന്ന മൂന്നു പഴയ വിമാനങ്ങളാണ് കഴിഞ്ഞ ഒരാഴ്ചയായി സൗദിലെ സോഷ്യല്‍ മീഡിയ നിറഞ്ഞിരിക്കുന്നത്.
ആഡംബര കാറുകള്‍ സമ്മാനമായി പ്രഖ്യാപിച്ചതോടെ നിരവധി പേരാണ് ചിത്രങ്ങളും വീഡിയോകളും പങ്കുവെക്കുന്നത്. റോഡരികില്‍ വിമാനങ്ങളെ നൃത്തം ചെയ്തു സ്വീകരിച്ച സൗദി പൗരനാണ് ആദ്യ സമ്മാനം ലഭിച്ചത്. ശേഷം സൗദി എയർലൈൻസ് വിമാനം റിയാദിലെത്തിക്കുന്ന ചിത്രം പകർത്തിയ മൂന്ന് പേർ കൂടി വിജയികളായി. വിമാനങ്ങളുടെ ഏറ്റവും നല്ല വീഡിയോകളും ഫോട്ടോകളും പകർത്തുന്ന ആറ് പേർക്കാണ് ലക്ഷ്വറി കാറുകള്‍ സമ്മാനമായി പ്രഖ്യാപിച്ചിട്ടുള്ളത്.
ജനങ്ങളുടെ വൻ പങ്കാളിത്തം കണക്കിലെടുത്ത് സമ്മാനമായി ഏറ്റവും പുതിയ മോഡല്‍ അഞ്ചു ആഡംബര കാർ കൂടി നല്‍കുമെന്ന് എന്റെർടൈമെന്റ് അതോറിറ്റി പ്രഖ്യാപിച്ചിരുന്നു. ചെറിയ കുട്ടിയടക്കം മൂന്നു പേരാണ് ഇപ്പോള്‍ സമ്മാനത്തിനർഹരായത്. സൈനിക വേഷത്തില്‍ വിമാനങ്ങളെ സ്വീകരിക്കുന്ന സൗദി ബാലന്റെ ദൃശ്യങ്ങളും ഇപ്പോള്‍ വൈറലാണ്.
ആഘോഷത്തോടെയാണ് ഈ വമ്ബൻ വിമാനങ്ങളുടെ നടുറോഡിലൂടെയുള്ള യാത്ര. പ്രധാന റോഡിലൂടെ ഉയരം ഒരു പ്രശ്‌നമായതിനാല്‍ മറ്റു റോഡുകളാണ് ആശ്രയിക്കുന്നത്. ഗ്രാമങ്ങളിലൂടെ പോകുന്ന ഈ കൂറ്റൻ വിമാനങ്ങള്‍ക്ക് വലിയ സ്വീകരണമാണ് ലഭിക്കുന്നത്.
ഈ അത്ഭുത കാഴ്ച കാണാനായി സ്ത്രീകളും കുട്ടികളുമുള്‍പ്പെടെയുള്ളവർ റോഡിനിരുവശവും കൗതുകത്തോടെ കാത്തുനില്‍ക്കും. വിവിധ ഗ്രാമപ്രമുഖന്മാർ തൊഴിലാളികളെ കഹ്വ നല്‍കി സ്വീകരിക്കുന്നതും കാണാം.
600 ഓളം കിലോമീറ്റർ ഇതിനകം പിന്നിട്ടിട്ടുണ്ട്. രണ്ടാഴ്ചയോളം യാത്ര വേണം റിയാദിലെത്താൻ. 12 ലക്ഷം റിയാലാണ് ചെലവായി കണക്കാക്കുന്ന തുക. നിർമിത ബുദ്ധി അടക്കമുള്ള നൂതന സാങ്കേതിക വിദ്യകള്‍ ഉപയോഗിച്ചാണ് വിമാനങ്ങള്‍ റിയാദിലേക്ക് കൊണ്ടുപോകുന്നത്
