പഞ്ചാബ് ബിജെപി അധ്യക്ഷൻ സുനില്‍ ജാഖർ രാജിവെച്ചതായി റിപ്പോർട്ട്. സംസ്ഥാനത്ത് പഞ്ചായത്ത് തിരഞ്ഞെടുപ്പിന് ദിവസങ്ങള്‍ മാത്രം ബാക്കിയുള്ളപ്പോഴാണ് പാർട്ടിയെ പ്രതിസന്ധിയിലാക്കി സുനില്‍ ജാഖറിന്റെ രാജി വാർത്ത വരുന്നത്.
എന്നാല്‍ രാജി ഔദ്യോഗികമായി പ്രഖ്യാപിച്ചിട്ടില്ലെന്നാണ് വിവരം. അദ്ദേഹവുമായി ബന്ധപ്പെടാൻ സാധിക്കുന്നില്ലെന്ന് ദേശീയ മാധ്യമങ്ങള്‍ റിപ്പോർട്ട് ചെയ്തു. അദ്ദേഹം കുറച്ചുകാലമായി സജീവ പ്രവർത്തനം നടത്തുന്നില്ലെന്നാണ് സുനില്‍ ജാഖറുമായി അടുത്ത വൃത്തങ്ങള്‍ അറിയിച്ചിട്ടുള്ളത്.
സംസ്ഥാന അധ്യക്ഷനെന്ന രീതിയില്‍ സ്വതന്ത്രമായി പ്രവർത്തിക്കാൻ കഴിയുന്നില്ലെന്ന് ബിജെപി ദേശീയ നേതൃത്വത്തെ സുനില്‍ ജാഖർ അറിയിച്ചതായി പാർട്ടി വൃത്തങ്ങള്‍ അറിയിച്ചു.
ലോക്സഭാ തിരഞ്ഞെടുപ്പിന് ശേഷം സംസ്ഥാന രാഷ്ട്രീയത്തിലെ തന്റെ ഇടപെടല്‍ ജാഖർ കുറച്ചിരുന്നു. സെപ്തംബർ 3 ന് ചണ്ഡീഗഢില്‍ നടന്ന ബിജെപി സംസ്ഥാന യോഗത്തില്‍ പാർട്ടി അംഗത്വ യജ്ഞത്തിന് തുടക്കമിട്ടതായിരുന്നു അദ്ദേഹം അവസാനമായി പങ്കെടുത്ത പൊതുയോഗം.
പഞ്ചാബിലെ കോണ്‍ഗ്രസ് അധ്യക്ഷനായിരുന്ന ജാഖർ 2022-ലാണ് പാർട്ടി വിട്ടത്.തുടർന്നാണ് അദ്ദേഹം ബിജെപിയില്‍ ചേർന്നത്. പിന്നാലെ ബിജെപി അദ്ദേഹം പാർട്ടി സംസ്ഥാന അധ്യക്ഷനായി നിയമിക്കുകയുമായിരുന്നു. അദ്ദേഹത്തിന്റെ നിയമനത്തില്‍ ബിജെപി സംസ്ഥാന നേതാക്കള്‍ക്ക് അതൃപ്തിയുണ്ടായിരുന്നു
