പെരുമ്ബാവൂർ: പെരുമ്ബാവൂർ നഗരസഭ വക സുഭാഷ് ചന്ദ്രബോസ് മുൻസിപ്പല്‍ സ്റ്റേഡിയത്തില്‍ മയക്കുമരുന്ന് വില്‍പ്പനക്കാരും മയക്കുമരുന്ന് ഉപയോഗിക്കുന്നവരും തമ്ബടിക്കുന്നത് സ്കൂള്‍ വിദ്യാർത്ഥികള്‍ക്കും നാട്ടുകാർക്കും ഭീഷണിയാകുന്നു.
ഏറെനാളുകളായി മയക്കുമരുന്ന് സംഘങ്ങള്‍ ഇവിടം കേന്ദ്രീകരിച്ച്‌ രാത്രിയും പകലെന്നുമില്ലാതെ മയക്കുമരുന്ന് വില്‍പ്പന നടത്തുകയാണ്. മയക്കുമരുന്ന് ഉപയോഗിക്കാനുള്ള സൗകര്യങ്ങളും മാഫിയ സംഘങ്ങള്‍ ഒരുക്കിക്കൊടുത്തിട്ടുണ്ട്. മുമ്ബ് മയക്കുമരുന്ന് സംഘങ്ങളുടെ ശല്യം ഏറിയപ്പോള്‍ നാട്ടുകാർ പരാതി നല്‍കിയതിനെ തുടർന്ന് അധികൃതർ ഇടപെടുകയും പൊലീസ്, എക്സൈസ് ഉദ്യോഗസ്ഥർ സ്ഥലത്തെത്തി ഇവരെ തുരത്തുകയും ചെയ്തിരുന്നു. അന്ന് മുഴുവൻ സമയവും തുറന്നുകിടക്കുകയായിരുന്നു സ്റ്റേഡിയത്തിന്റെ ഗേറ്റുകള്‍. പരാതിയെ തുടർന്ന് പുറകുവശത്തെ ഗേറ്റ് അടുത്തിടെ വരെ പൂട്ടിയിരുന്നു. എന്നാല്‍ ഇപ്പോള്‍ എല്ലാ ഗേറ്റുകളും മയക്കുമരുന്നു മാഫിയക്ക് വിഹരിക്കുവാൻ തുറന്നിട്ട അവസ്ഥയിലാണ്. 24 മണിക്കൂറും ഈ ഗേറ്റുകള്‍ തുറന്നുകിടക്കുന്നതിനാല്‍ മയക്കുമരുന്ന് സംഘങ്ങള്‍ക്ക് ഏതു സമയത്തും സുഭാഷ് മൈതാനിയില്‍ പ്രവേശിച്ച്‌ സ്വൈരവിഹാരം നടത്താൻ കഴിയുന്നു.
സ്റ്റേഡിയത്തിന്റെ പുറകുവശത്ത് സിറിഞ്ചുകളും മയക്കുമരുന്നുകളുടെ ഒഴിഞ്ഞ ഡപ്പികളും കുന്നുകൂടി കിടക്കുകയാണ്. മയക്കുമരുന്ന് മൈതാനത്ത് പല ഭാഗങ്ങളിലായി കുഴിച്ചിട്ടിട്ടുണ്ടോ എന്നും സംശയമുണ്ട്. മയക്ക് മരുന്ന് സംഘങ്ങളുടെ താവളമായി മാറിയ മുൻസിപ്പല്‍ സ്റ്റേഡിയത്തിന് പുറകുവശത്തോട് ചേർന്ന് പെണ്‍കുട്ടികള്‍ മാത്രം പഠിക്കുന്ന പെരുമ്ബാവൂരിലെ പ്രധാന വിദ്യാലയമാണ് സ്ഥിതി ചെയ്യുന്നത്. നിരവധി തവണ സ്കൂള്‍ അധികൃതർ ഇതു സംബന്ധിച്ച്‌പരാതി നല്‍കിയിട്ടും ഒരു നടപടിയും ഉണ്ടായിട്ടില്ല
മുനിസിപ്പല്‍ സ്റ്റേഡിയത്തിലെ മയക്കുമരുന്ന് മാഫിയയുടെ വിളയാട്ടം ഇല്ലാതാക്കാൻ അധികൃതർ അടിയന്തിരമായി ഇടപെടണം.
