ദുബൈ: അബൂദബിയില്‍നിന്ന് കാണാതായ മലയാളി യുവാവിനെ ദുബൈയിലെ പാലത്തില്‍ നിന്ന് ചാടി മരിച്ച നിലയില്‍ കണ്ടെത്തി.
തിരുവനന്തപുരം കരുംകുളം പുതിയതുറ അഴങ്കല്‍ പുരയിടം ഡിക്സണ്‍ സെബാസ്റ്റ്യൻ (26) ആണ് മരിച്ചത്.
ദിവസങ്ങള്‍ക്ക് മുൻപ് കാണാതായ ഡിക്സനെ പൊലീസും ബന്ധുക്കളും അന്വേഷിച്ചു വരികയായിരുന്നു. ഇതു സംബന്ധിച്ച വാർത്ത നേരത്തെ ഗള്‍ഫ് സുപ്രഭാതത്തില്‍ പ്രസിദ്ധീകരിച്ചിരുന്നു. അബൂദബിയില്‍ ഇലക്‌ട്രോണിക്സ് സ്ഥാപനത്തില്‍ വാച്ച്‌ മേയ്ക്കറായി ജോലി ചെയ്തുവരികയായിരുന്നു.
ദുബൈയിലെ ശൈഖ് സായിദ് റോഡില്‍ സാബീല്‍ റോഡിനടുത്തുള്ള പാലത്തില്‍ നിന്ന് ചാടി മരിച്ചതാണെന്ന് സംശയിക്കുന്നതായി പൊലീസ് പറഞ്ഞതായി സാമൂഹിക പ്രവർത്തകൻ നസീർ വാടാനപ്പള്ളി അറിയിച്ചു.
ദുബൈ ആശുപത്രി മോർച്ചറിയില്‍ സൂക്ഷിച്ചിട്ടുള്ള മൃതദേഹം നടപടികള്‍ക്ക് ശേഷം നാട്ടിലേയ്ക്ക് കൊണ്ടു പോകും.
