കൊല്ലം: ഓണപ്പൂക്കളമിടുന്നതിന് വേണ്ട പൂക്കള്‍ ശേഖരിച്ചു വരുന്നതിനിടെ കോണ്‍ക്രീറ്റ് പാലം തകർന്ന് തോട്ടില്‍വീണ വീട്ടമ്മ മരിച്ചു.
പടിഞ്ഞാറെ കല്ലട ഐത്തോട്ടുവ പുല്ലാഞ്ഞിയില്‍ വിഷ്ണുവിലാസത്തില്‍ ഓമന(58)യാണ് മരിച്ചത്. മലയാറ്റുമുക്കിനു സമീപത്തെ തോടിനു കുറുകേയുള്ള 40 വർഷത്തോളം പഴക്കമുള്ള പാലമാണ് തകർന്നുവീണത്. ഓമന പാലം കടക്കുമ്ബോള്‍ തകർന്നുവീണ് കോണ്‍ക്രീറ്റിന് അടിയില്‍പ്പെടുകയായിരുന്നു.
കഴിഞ്ഞദിവസം വൈകീട്ടായിരുന്നു സംഭവം. തോടിന്റെ കരയിലാണ് ഒാമനയുടെ വീട്. വീട്ടിലേക്ക് പോകാനുള്ള ഏക വഴിയാണ് നടപ്പാലം. അത്തപ്പൂക്കളത്തിന് പൂക്കള്‍ ശേഖരിക്കുന്നതിനുപോയി തിരികെ വീട്ടിലേക്ക് വരുമ്ബോഴാണ് അപകടമെന്ന് ബന്ധുക്കള്‍ പറഞ്ഞു. പാലത്തിന്റെ കോണ്‍ക്രീറ്റ് മൂന്നായി തകർന്ന് നിലംപൊത്തുകയായിരുന്നു.
ഏറെ വൈകിയും ഓമന വീട്ടിലെത്താതായതോടെ ഭർത്താവ് ശ്രീധരൻ ആചാരി അന്വേഷിച്ച്‌ ഇറങ്ങുകയായിരുന്നു. നടപ്പാലം തകർന്നുകിടക്കുന്നതുകണ്ട് അദ്ദേഹം മറ്റുള്ളവരെ വിവരമറിയിച്ചു. തുടർന്ന് നടത്തിയ തിരച്ചിലില്‍ കോണ്‍ക്രീറ്റിന് അടിയില്‍ കുടുങ്ങിയനിലയില്‍ ഓമനയെ കണ്ടെത്തി. പുറത്തെടുത്ത് ശാസ്താംകോട്ട താലൂക്ക് ആശുപത്രിയിലെത്തിച്ചെങ്കിലും മരിച്ചു. മക്കള്‍: വിഷ്ണു, മഞ്ജു
