അരിയിൽ ശുക്കൂർ വധക്കേസിൽ പ്രതിചേർക്കപ്പെട്ടതിനെ തുടർന്ന് സി.ബി.ഐ. കോടതിയിൽ പി.ജയരാജനും ടി.വി. രാജേഷും ഫയൽ ചെയ്തിരിക്കുന്ന ഡിസ്‌ചാർജ്ജ് പെറ്റീഷൻ സി.ബി.ഐ. കോടതി തള്ളിയിരിക്കുന്നു.
മുസ്ലിംലീഗ് സംസ്ഥാന പ്രസിഡണ്ട് പാണക്കാട് സയ്യിദ് സാദിഖലി ശിഹാബ് തങ്ങളും ദേശീയ ജനറൽ സെക്രട്ടരി പി.കെ.കുഞ്ഞാലിക്കുട്ടി സാഹിബും പി.എം.എ. സലാം സാഹിബുമുൾപ്പെടെ മുസ്ലിംലീഗ് സംസ്ഥാന കമ്മറ്റിയുടെ നിരീക്ഷണത്തിലും മേൽനോട്ടത്തിലും ജില്ലാ മുസ്ലിംലീഗ് കമ്മറ്റിയും ഷുക്കൂറിന്റെ കുടുംബവും നടത്തുന്ന നിയമ പോരാട്ടങ്ങളുടെ വിജയമാണ് ഈ കോടതി വിധി.
കൊലപാതകത്തിനായി ഗൂഢാലോചന നടന്നെന്നത് തെളിയിക്കുന്നതിനുള്ള സാക്ഷി മൊഴികള്‍ ഉണ്ടെന്നും ജയരാജന്റെയും, ടി വി രാജേഷിന്റെയും പങ്ക് തെളിയിക്കുന്ന ഫോണ്‍ രേഖകളും, സാക്ഷിമൊഴികളും സാഹചര്യത്തെളിവുകളുമുണ്ടെന്നും ഷുക്കൂറിന്റെ മാതാവിനുവേണ്ടി ഹാജരായ അഭിഭാഷകൻ കോടതിയെ അറിയിച്ചിരുന്നു.
സംസ്ഥാനത്ത് ഏറെ കോളിളക്കമുണ്ടാക്കിയ ഒന്നാണ് ഷുക്കൂർ വധം. മുസ്ലീംലീഗിന്റെ വിദ്യാർത്ഥി സംഘടനയായ എംഎസ്‌എഫിന്റെ പ്രാദേശിക പ്രവർത്തകനായിരുന്ന ഷുക്കൂർ 2012 ഫെബ്രുവരി 20 നാണ് കൊല്ലപ്പെട്ടത്. പി ജയരാജനും ടി വി രാജേഷുമടക്കമുള്ളവർ സഞ്ചരിച്ച വാഹനം തളിപ്പറമ്ബിന് സമീപത്തുള്ള പട്ടുവത്ത് വച്ച്‌ തടഞ്ഞ് യൂത്ത് ലീഗ് പ്രവർത്തകർ ആക്രമിച്ചിരുന്നു. ഈ സംഭവം കഴിഞ്ഞ് ഏതാനും മണിക്കൂറുകള്‍ക്കകമാണ് ചെറുകുന്ന് കീഴറയില്‍ വച്ചാണ് ഷുക്കൂർ കൊല്ലപ്പെട്ടത്. അക്രമികള്‍ വിചാരണ നടത്തിയശേഷം കീഴാറയിലെ ഒരു പാടത്തിട്ട് കുത്തി കൊലപ്പെടുത്തുകയായിരുന്നു.
വാഹനം ആക്രമിക്കപ്പെട്ടതിനെത്തുടർന്ന് പി ജയരാജനെയും ടി വി രാജേഷിനെയും പ്രവേശിപ്പിച്ച തളിപ്പറമ്ബ് സഹകരണ ആശുപത്രി കേന്ദ്രീകരിച്ചാണ് സിപിഎം പ്രാദേശിക നേതാക്കള്‍ ആക്രമണത്തിന് ആസൂത്രണം ചെയ്തതെന്നും ഇത് ജയരാജനും രാജേഷിനും അറിയാമായിരുന്നെന്നും കുറ്റപത്രത്തില്‍ പറയുന്നു.
പൊലീസ് അന്വേഷണം ഫലപ്രദമല്ലെന്നാരോപിച്ച്‌ ഷുക്കൂറിന്റെ അമ്മ ആതിക്ക നല്‍കിയ ഹർജിയില്‍ ഹൈക്കോടതിയാണ് സിബിഐ അന്വേഷണത്തിന് ഉത്തരവിട്ടത്. 34 പ്രതികളുള്ള കേസില്‍ പി ജയരാജൻ, ടിവി രാജേഷ് എന്നിവർ യഥാക്രമം 33, 34 പ്രതികളാണ്.
ഷുക്കൂറിനും കുടുംബത്തിനും പാർട്ടിക്കും നീതി കിട്ടും വരെയുള്ള നിയമപോരാട്ടം മുസ്ലിം ലീഗ് തുടരുക തന്നെ ചെയ്യും.
